കാലമിടറുമെന്നിരിക്കേ

ഇനിയൊഴുകാനാവില്ലെന്നമട്ടിൽ
തടാകമൊരു പെണ്ണിനെപ്പോലുറങ്ങുന്നു

ഏകനൗകയിലാകാശം
തുഴഞ്ഞെത്തുമീറൻ തണുപ്പും
താണ്ടുമൊരു തുലാമഴപോലവളിരുളുന്നു
ചിലപ്പോളിത്തിരി വെളിച്ചം തൂകുമൊരു
മിന്നൽച്ചിരി കണക്കേ തെളിയുന്നു

ഇലകളിൽ നിറമൊഴിയും ശിശിരം
വെയിലിനെ ചുരുട്ടിയെടുക്കുന്നു
ഇനിയൊഴുകാനാവില്ലെന്നമട്ടിൽ
തടാകമൊരു പെണ്ണിനെപ്പോലുറങ്ങുന്നു

അതിദ്രുതം ഭൂമി കീറുന്നു
ഭ്രാന്തമായൊരു കാറ്റവളെയതി-
ലേക്കാഴ്ത്തുന്നു, തണുപ്പേറ്റുന്നു

കുന്നിറങ്ങും പൂക്കാലവും
കവർന്നുകൊണ്ടോടിമറയും
വിചിത്രവിഷാദങ്ങൾ

പ്രത്യാനയനം, മറന്നുപോയൊരു ദിവസവുമായി
വാതിലിനപ്പുറമൊരു കാലം
ഗ്രാമസന്ധ്യയിലെ തോർച്ചപോൽ
അവളിൽ പൂക്കുന്നു
ഇരുൾ കനക്കുന്നു വീണ്ടും
രാത്രിയെത്താനിനിയേറെയെങ്കിലും.

Cover illustration by Kitty Sabatier

3.8 6 votes

Rating